تله س

تله س، گل. منی فیرتانایا سالماغا تله س! وور، آغلات، منی اؤزومدن آلماغا تله س!

تله س، یوللارا پاییز قوخوسو دوشمه میش گل، گؤزلریم شکیلینی ایتیرمه میش گل! منه دئمیشدین گؤزلرینی یوم، اوناجان سایسان بوردایام.  بیر، ایکی... اون ساعات، اون گون، اون آی، اون ایل.. دونیانین بوتون اونلارینی سایدیم.. گؤزلریم آغریییر داها آچیلمیر، سوسوز تورپاق قالماییب کی گؤز یاشلاریمدان ایسلانماسین،من سنه بیر یعقوب، یوسوفوم اول گل! گؤزلریمده سنی ایتیردییم ایللر بویو تورپاق قالانیب، تله س گل، هله منلیییمین قوخوسو گلیر تورپاقدان، هله ایستیدیر تورپاغیم، من تورپاغا دؤنمه میش گل!

آ جانیم. نفس لریم بویدا اینتیظارلا گؤزلورم سنی، یئرین نبضی چالینجا سسلیرم سنی، تورپاغیمین گوللری سن بویدا اولوب، گل، گل هله گؤر نئجه سئویرم سنی..

من تورپاق اولسامدا، چوخ اؤزلورم سنی، چوخ سئویرم منی سئوه سن! منی سئومه یه تله س..!!

گل...

یازار: آی سو

سن؟؟!!
.
.
.
.
.
یئنه، سنسیز...
...
یئنه، سن سیز...
....
یئنه ، سن، سیز...
.....
نه قدر اؤزله دیم ده،

هئچ یوخوما دا گیرمه دیز سیز...


آی سو



 

    پنجره

                 

آی اوزلوم ندن مندن گیزله نیرسن؟ بو قارانلیق دا سنی هاردان آختاریم؟ هارداسان؟ هانسی بختورین گؤیونده اوتوراق ائله ییب، گئجه سینی گوندوزه بدل ائدیب سن؟ يئنه نه قدر گؤزله دیم گلمه دین، اولمایا بیلمیرسن بیر عؤموردور گؤزلرینین تامارزیسی یام؟ باخیشینین اومودویلا قارانلیقا گؤز دیكمیشم، بلكه قارا ایللر دالیندان آغ-پارلاق آیییم چیخسین و یاشلاریمی ده یرله ندیرسین. بو گؤز یاشلاریم «بلكه بیر گون آخیب چیینینده دایانسین» دئیه، بیرعؤموردور سنی اؤزله ییر.

دئ گؤروم؛ گؤیون هانسی قاتینین آلدادیجی گؤزللیك لری سنی آلدادیب؟ نه وعده سی منی سنین مئهریبان خاطیریندن اونوتدوروب كی بئله سنسیزلیگه محكومام و سن منیم قارا باختیم كیمی قارانلیقدا قالیب یاغار گؤزلریمه راضی سان..

هر گئجه سنین گلمه گینین اومودیلا اویاق قالیرام، آیا باخاركن خیالا دالیرام؛ سانكی سنسن گلیرسن بولود دالیندان قاش-گؤز آتیب منی مندن آلیرسان.. من كی هردن سنی بیرآن گؤروب، گیزلین باخیشلارینا راضی ایدیم، ندن او امنیت وئریجی باخیشلاری منه چوخ گؤردون، هئچ زامان بیلمزسن كی گلیب پنجره مین اؤنوندن كئچمه لرین نه قدر اومود وئریجی ایدی، دئ گؤروم هارا باغلانیبسان كی هر آن بو باغلی پنجره یوخلوغونو اوزومه چكیر؟؟

اوزون زامان دیر بو گئجه یه آچیلان پنجره خیالین لا گؤزلریمی اوینادیر، آی لی گئجه لر اوره ییمین دؤیونتوسو اوتاغیمین سوكوتون سیندیریر، نییه كی آی هر آددیم آتدیقجا پنجره سنی یادیما سالیر..

آی اوزلوم ندن دؤنوب گلمیرسن؟ من هر زامان سنی اؤزله ییرم و لحظه لری ساییرام بلكه گله جكده گله سن... آی اوزلوم دؤن گل...

یازار: آی سو

شهید

سورگون

تانیش بیر قوخو بورنونو سیغیشدیردی، نه اولدوغونو بیلمیردی آما بو قوخواونون ایللر بویو ایتیب- باتان حیسس لرینی اویادیردی، «بلكه...آما یوخ.. یوخ بو ایش ایمكان سیز. من بئله موتلو اولا بیلمرم » بو اولایا دوشونمك اونو آیاقدان سالیردی، آما بو قوخودان واز گئچه بیلمیردی، نه یی ایتیرسه، نه یی اونودسادا، بو اونودولان بیر شئی دئییل.. گؤزلرینین آغری سینی بیرداها یئنی دن حیسس ائتدی، گؤره بیلسه یدی كاش!! اللری آج لیقدان قورتولان قورد كیمی کلفچه نی(دست بند) سیندیریب بیر- بیریندن آیریلماق ایسته ییردی، بلكه بیر تانیش بیر شئی لمس ائدیب دینجه لسین، آیاق لاری تیریم- تیریم اسیردی سانكی ایندی ایشكنجه آلتیندان چیخیب میش.اوره یینین سسی نی ائشیدیب بیلیردی بو تانیش قوخو اونو تالواسالا سالیب. «.. نه بو تانیش قوخو؟؟.. نه بو تانیش قوخو تانریم كی بئله منی ایللر بوندان اؤنجه یه آپاریر؟ بو پولاد آرابادان دوشه بیلسه یدیم كاش.. بو آرابا كی ایللر اونو سیندیرماغا دوشونموشم و ایندی منیم اسگی یولداشلاریمین بیری اولوب، فیكیر داشلاریم و دیلداش لاریمی آلان بو آرابا!! هله دیر بو سوروندوكده ائلمین مارشینی ائشیده بیلیرم،هله دیر زامان توزو باسماییب او سسلری، هله دیر قان قوخویور هر حیسسه سی، ایهانت قوخویور بو آرابا!... آما ایللردیر یولداشلاریمین ایزینی یالنیز بو آرابادان آلا بیلیرم، بیزی پارچالاییب داغیداركن اومورام بیزی دوشونور، بلكه ده اودا بو بؤیوك ظولمدن دویوب، اونا قارشی دورماق ایسته ییر.. آچ قاپی لارینی آی آرابا! آچ! سنی تانری بو كز منی دوشون!.. آچ بو باغلی قاپی لاری...! »

قیش لاریندا ایختییار یوخدو یول یئریمك ایچین.. نه آجدیر، نه ده گوجسوز. آما بو قوخو.. بو عطیرلی هاوا... بو لذذتله دولو نفسلر اونو قرار سیز ائدیر... دونیا باشینا دولانیردی.. یارالی قوش كیمی فیرلانیب، ده یدی یئره... باشی ایسلاندی، دوشوندو:«یئره ایستی سو تؤكوب لر..»

بورنوندا داها بیر تانیش قوخونو حیسس ائتدی؛ قان قوخوسو!! اؤز قانینین قوخوسو و سئوگی سی تورپاغین عطیرینی..، ییخیلمیش دوغما یوردونون قوینونا، اونون اوچون ایللر سورگون اولموش... یولداش لار و فیكیردالارینی الدن وئرمیش.. چتین لیك لر و آجی لار چكمیش..و..

 ایندی توم وارلیغییلا، سللول لارینین هر تك به تكی ایله موتلولوغو حیسس ائدیردی نییه كی تورپاغ قوینونو اونا آچمیش و او دوداغیندا كی سون گولوشله سئوگیلی سینین گؤروشونه گئدیردی..

 یازار: آی سو

اوستون تؤرنیش

بو گون تانری منیم شکیلیمی چکدی. حیجابسیز، پرده سیز و سو سپدی اوزومه. دئدی:«آیدین لیق ایچیندی!»  سونرا قاه قاه گولدو. یئر گؤی تیتره دی. سونرا سنی یاراتدی منه! یالنیز منیم ایچین!

ایندی دوشونورم، ایندی بونو آنلاییرام؛ من سنه یوخ، سن منیم ایچین یارانیبسان!! توم ارکک لرین یارانیشی کیمی. باخ... اؤزونه بیر باخ!! هارا گئدیرسن؟؟ بو یوللار سنی ایتیرجک،
سن اؤزونو ایتیرجک سن! آما من هر زامانکی کیمی سنین یانیندایام، من وارام، منی دوشون!!من سنینله یم، من.. سنی اؤزونه قایتاران سن لییینم.  منه باااااخ!«بو گون چوخ آیدین دیر منیم ایچین» تانریم دئدی

بس سن ایلک کز اؤزونه یوخ منه قاییداجاقسان!!

یازار: آی سو

منی سئویرسن!

ایسته ییرم سندن یازیم، سنین سوچلاریندان یازیم سن كی قئددیس دئییل سن! قوی سنه وورقونلاردا بیلسین لر آما سنین سنلییینه حوكم ائدن باخیشلارینا نه دئییم؟؟؟ بو باخیشلار گلیر دورور گؤزومون اؤنونده  من چیلغین! من دلی..!! من سنه وورولموشام !! من...باخ سن قئددیس دئییل سن كی!؟؟

ملك دئییل سن كی؟!! سن.. سن یالنیز بیر اینسانسان!! دوشون...!؟ من سوچام، آغری یام، وارلیغاممن قیرمیزی آلما سوچویام، من سئوگی آغریسی یام، من سنین وارلیغینام!! «منی سئویرسن، سن منی چوخ سئویرسن!» بونو گؤزلریندن آنلادیم، اوندا کی منه باخمیردین باخیردین آیدین چایا و من او سویون آیدین لیغیندا یالنیز سئوگی آنلادیم. سن ایسته سنده ایسته مه سنده

مندن آرتیق دوشونه بیلمه زسن!

یازار: آی سو

گؤروش..

بو گون توم یوللاریم سنه دؤنور آما سنه دوشونمك ایچین هئچ ماهانام یوخ، اؤزومله بو قرارا گلمیشم كی سنه دوشونمه ییم، آما بو قرار مندن قرار آلیب. هر آن اؤزلورم سنی، ساعاتین هر تیك تاكیلا باخیشلاریم ساعاتا یالواریر بلكه زامان گئچسین..

تیك.. تاك..تیك.. تاك..

نبضیم ساعات لا برابر چالیر.. گؤزلریم تیلفوندا قولاغیم بیر تیكا باغلی دیر توم وارلیغیم سنین له گئچدییی آنلاریم دا قالیب سنی چوخ اؤزلورم آما اؤزومه سؤز وئرمیشم ایلك دفعه سنه یوخ دئییب سنین گؤروشونه گلمه یه جه یم

- الو سلام

- بویورون؟ سلام..

- «یاخشی سان گولوم؟ بو آخشام هر زامان گؤروشدویوموز یئرده سنی گؤزلورم. گئج گلمه هاااا، بو گون سنسیزله میشم، گلمزسن داریخارام»

و من دوشونورم نئچه هفته بو آجی لارا دؤزوموم اولاجاق

یالنیز سنی گؤردویوم نئچه آن ایچین....

یازار: آی سو