آی اوزلوم ندن مندن گیزله نیرسن؟ بو قارانلیق دا سنی هاردان آختاریم؟ هارداسان؟ هانسی بختورین گؤیونده اوتوراق ائله ییب، گئجه سینی گوندوزه بدل ائدیب سن؟ يئنه نه قدر گؤزله دیم گلمه دین، اولمایا بیلمیرسن بیر عؤموردور گؤزلرینین تامارزیسی یام؟ باخیشینین اومودویلا قارانلیقا گؤز دیكمیشم، بلكه قارا ایللر دالیندان آغ-پارلاق آیییم چیخسین و یاشلاریمی ده یرله ندیرسین. بو گؤز یاشلاریم «بلكه بیر گون آخیب چیینینده دایانسین» دئیه، بیرعؤموردور سنی اؤزله ییر.
دئ گؤروم؛ گؤیون هانسی قاتینین آلدادیجی گؤزللیك لری سنی آلدادیب؟ نه وعده سی منی سنین مئهریبان خاطیریندن اونوتدوروب كی بئله سنسیزلیگه محكومام و سن منیم قارا باختیم كیمی قارانلیقدا قالیب یاغار گؤزلریمه راضی سان..
هر گئجه سنین گلمه گینین اومودیلا اویاق قالیرام، آیا باخاركن خیالا دالیرام؛ سانكی سنسن گلیرسن بولود دالیندان قاش-گؤز آتیب منی مندن آلیرسان.. من كی هردن سنی بیرآن گؤروب، گیزلین باخیشلارینا راضی ایدیم، ندن او امنیت وئریجی باخیشلاری منه چوخ گؤردون، هئچ زامان بیلمزسن كی گلیب پنجره مین اؤنوندن كئچمه لرین نه قدر اومود وئریجی ایدی، دئ گؤروم هارا باغلانیبسان كی هر آن بو باغلی پنجره یوخلوغونو اوزومه چكیر؟؟
اوزون زامان دیر بو گئجه یه آچیلان پنجره خیالین لا گؤزلریمی اوینادیر، آی لی گئجه لر اوره ییمین دؤیونتوسو اوتاغیمین سوكوتون سیندیریر، نییه كی آی هر آددیم آتدیقجا پنجره سنی یادیما سالیر..
آی اوزلوم ندن دؤنوب گلمیرسن؟ من هر زامان سنی اؤزله ییرم و لحظه لری ساییرام بلكه گله جكده گله سن... آی اوزلوم دؤن گل...
ساعاتا باخدی، ساعات ایكینی اییرمی دقیقه كئچیردی، اوره یی دؤیونوردو، ایضطیراب و اینتیظاردان بوغولوردو، آجی دوشونجه لر ذهنینی جیزیخ لارییردیلار...
یئنه ساعاتا باخدی، ایكینی اییرمی ایكی دقیقه؛ بو دقیقه لر ندن بئله اوزون سورونور؟؟ ندن گئج قالدی؟ هر زامان بیر یئره گئتسه یدی اؤنجه دن خبر وئرردی... بس ایندی هاردا قالدی گلمه دی؟ ... مین لرجه جاواب سیز سورو باشینی دولدورموشدو، كاش بیری سورولارینی جاواب لایاردی.. آمان تانریم بیر یاریمدا ایش یئریندن چیخیب، اییرمی دقیقه لیك یولدا ندن بیر ساعات گئجیكیب؟؟ یارادانیم هر یاندا اولسا اؤزون یاردیمجی سی اول.
دؤرد یاشیندا اوشاغی جئیران باخیش لی گؤزلرله آنانین تالواسالینی ایزله ییب، دوداغیندان مین-بیر سورو یاغیردی؛« آنام ندن بئله اؤزون قاپی- باجایا چالیر؟ آتام ندن بئله گئجیكیب؟ ..» سانكی اوشاقدا آتاسینین غئیبتینی دوشونوب تالواسالا دوشموشدو... اویونجاق(اسباب بازی)لارینی گؤتوروب، یئنیدن آتیردی. آزی اون كز هر بیرینی گؤتوروب آتمیشدی، آما بو ایشدن یورولموردو.. بلكه ده بو ایشله اؤز باشینی قاتیردی...
گؤرن بو آنا- بالا ائوین آتاسینین بیر ساعت گئجیكمه سینه بئله داریخیردیلار یوخسا گیزلین بیر خبرلر وار كی یالنیز اورك لر ایلگیسی بیلدیری وئرر؟؟
بیر داها نومارانی دوتدو، دسترسده اولمادیغین خبر وئرن قادین ایندی نومارانین سؤنوك اولدوغونو خبر وئریردی... رنگی خزل كیمی سولوب، تیلفون الیندن دوشدو.. آجی دوشونجه لره دؤزوب اؤزون ایتیرمه ین قادین بو آغیر ضربه یه داوام گتیرمه ییب پاییز یارپاغی كیمی یئره سریلدی.. اؤزونه گلیب گؤردو دؤرد یاشیندا اوشاغی بالاجا اللری ایله آنانین گؤز یاشلارینی سیلیر.. و «آنا. اویان» دئییر.. جیب تیلفونونون سسی چوخ اوجا و آغریلی ایدی ، تیلفونو آچاركن قوجاسینین یولداشی تیترك سسله دئدی:« باجیم تاسوفله خسته خانایا گلمه لی سینیز....»
یود و آلكول قوخوسو هر یانی بوروموشدو، آغ كاشی لارا باخاراق آددیم آتیردی، هر آددیمی آتدیقجا اومودسوزلوغا دوغرو گئدیردی. دووارلار و یئراورك چیرپینتیسینی ائشیتدیكجه اونون لا دانیشیردیلار، و ایشیق لی باخیش لاریلا اونا آیدین گله جكدن دئییردیلر. آما هر كس نه دئییر دئسین بو هاوا هر نه یی آنلادیردی اونا، هاوادا موتلولوق قوخوسو یوخویدو، هاوا یود قوخوسو وئریردی، كافور، بلكه ده.... یاشلاری آخدی، گؤز یاش لارینی سیلمك ایچین الینده گوج یوخویدو، باشی دولانیردی، بیر آن دونیا قارانلیق اولدو، یورقون قادین دا هئچ نه گؤره بیلمه دی.. سونوندا هر نه آغ گئیینمیشدی گونشین شفق لری پنجره دن یول تاپیب اوتاغا دولوردو.. آما ندن بو ایشیق لی گونده اینسان لار قارا گئییب آغلاییردیلار؟ هر كس بیر سؤز دئییردی، «.. اؤزلری ایسته دیلربئله اولسون كی دیلیمیز باغلانسین...».. «ایسته دیلر هم سرداریمیز گئتسین، هم هئچ كس سوروملو اولماسین...» .. سونوندا آناسینین سسی ایدی كی دئدی :«بولار اؤنملی دئییل لر یالنیز ائلیمیزین باشی ساغ اولسون. منیم بالام ائل شهیدی دیر من بولارا اوزولمه رم.. » چوخ سؤزلر دانیشیلدی آما كیمسه اونون سوروسونو جاوابلامادی؛« ندن بو ایشیق لی گونده بو آدام لار بئله قارا گئیینیب آغلاییردیلار؟»
زامانی ایتیرمیشدی، بیلیردی دؤردونجو گون اؤزگور هاوانی كؤكسونه چكه بیلر، بو نئچه واختی بو اولایا آلیشمیشدی(عادت ائله میشدی)، آما بو ایتی ایشیق كی تئیخا باشینین اوستوندن ساچیر، هئچ زامان آلیشمالی دئییل. بو ایشیق اونا یول گؤسترن شفق لری خاطیرلادیر و یولونون داواملاماسینین گرك لی اولماسینی آنلادیر، آنجاق بو ایشیق او سئودییی، او آرادیغی گونشین شفقی دئییل. او سئودییی گونش دیل قوخویور، ائل قوخویور، ... اوچ گوندن بیر اییرمی دقیقه لیك اؤزگور هاوادا اوخودوغو ائل مارشنین قوخوسو گلیر او آرادیغی گونشدن... آما ایندی توستولو گؤزلوك گؤزونده ایشیقا دوغرو گئدیر، اوردا اولان هر كس اونون لا احتیرام لا داورانیر، هر كسین نه سوچودا وارسا او سئودیی گونش ائل سئون گونش دیر و اؤز ائلینی سئون هر زامان قالارقی اولار...
تانیش بیر قوخو بورنونو سیغیشدیردی، نه اولدوغونو بیلمیردی آما بو قوخواونون ایللر بویو ایتیب- باتان حیسس لرینی اویادیردی، «بلكه...آما یوخ.. یوخ بو ایش ایمكان سیز. من بئله موتلو اولا بیلمرم » بو اولایا دوشونمك اونو آیاقدان سالیردی، آما بو قوخودان واز گئچه بیلمیردی، نه یی ایتیرسه، نه یی اونودسادا، بو اونودولان بیر شئی دئییل.. گؤزلرینین آغری سینی بیرداها یئنی دن حیسس ائتدی، گؤره بیلسه یدی كاش!! اللری آج لیقدان قورتولان قورد كیمی کلفچه نی(دست بند) سیندیریب بیر- بیریندن آیریلماق ایسته ییردی، بلكه بیر تانیش بیر شئی لمس ائدیب دینجه لسین، آیاق لاری تیریم- تیریم اسیردی سانكی ایندی ایشكنجه آلتیندان چیخیب میش.اوره یینین سسی نی ائشیدیب بیلیردی بو تانیش قوخو اونو تالواسالا سالیب. «.. نه بو تانیش قوخو؟؟.. نه بو تانیش قوخو تانریم كی بئله منی ایللر بوندان اؤنجه یه آپاریر؟ بو پولاد آرابادان دوشه بیلسه یدیم كاش.. بو آرابا كی ایللر اونو سیندیرماغا دوشونموشم و ایندی منیم اسگی یولداشلاریمین بیری اولوب، فیكیر داشلاریم و دیلداش لاریمی آلان بو آرابا!! هله دیر بو سوروندوكده ائلمین مارشینی ائشیده بیلیرم،هله دیر زامان توزو باسماییب او سسلری، هله دیر قان قوخویور هر حیسسه سی، ایهانت قوخویور بو آرابا!... آما ایللردیر یولداشلاریمین ایزینی یالنیز بو آرابادان آلا بیلیرم، بیزی پارچالاییب داغیداركن اومورام بیزی دوشونور، بلكه ده اودا بو بؤیوك ظولمدن دویوب، اونا قارشی دورماق ایسته ییر.. آچ قاپی لارینی آی آرابا! آچ! سنی تانری بو كز منی دوشون!.. آچ بو باغلی قاپی لاری...! »
قیش لاریندا ایختییار یوخدو یول یئریمك ایچین.. نه آجدیر، نه ده گوجسوز. آما بو قوخو.. بو عطیرلی هاوا... بو لذذتله دولو نفسلر اونو قرار سیز ائدیر... دونیا باشینا دولانیردی.. یارالی قوش كیمی فیرلانیب، ده یدی یئره... باشی ایسلاندی، دوشوندو:«یئره ایستی سو تؤكوب لر..»
بورنوندا داها بیر تانیش قوخونو حیسس ائتدی؛ قان قوخوسو!! اؤز قانینین قوخوسو و سئوگی سی تورپاغین عطیرینی..، ییخیلمیش دوغما یوردونون قوینونا، اونون اوچون ایللر سورگون اولموش... یولداش لار و فیكیردالارینی الدن وئرمیش.. چتین لیك لر و آجی لار چكمیش..و..
ایندی توم وارلیغییلا، سللول لارینین هر تك به تكی ایله موتلولوغو حیسس ائدیردی نییه كی تورپاغ قوینونو اونا آچمیش و او دوداغیندا كی سون گولوشله سئوگیلی سینین گؤروشونه گئدیردی..
بو گون تانری منیم شکیلیمی چکدی.حیجابسیز، پرده سیز و سو سپدی اوزومه. دئدی:«آیدین لیق ایچیندی!» سونرا قاه قاه گولدو. یئر گؤی تیتره دی. سونرا سنی یاراتدی منه! یالنیز منیم ایچین!
ایندی دوشونورم، ایندی بونو آنلاییرام؛ من سنه یوخ، سن منیم ایچین یارانیبسان!!توم ارکک لرین یارانیشی کیمی.باخ... اؤزونه بیر باخ!! هارا گئدیرسن؟؟ بو یوللار سنی ایتیرجک، سن اؤزونو ایتیرجک سن! آما من هر زامانکی کیمی سنین یانیندایام، من وارام، منی دوشون!!من سنینله یم، من.. سنی اؤزونه قایتاران سن لییینم. منه باااااخ!«بو گون چوخ آیدین دیر منیم ایچین» تانریم دئدی
ایسته ییرم سندن یازیم، سنین سوچلاریندان یازیمسن كی قئددیس دئییل سن! قوی سنه وورقونلاردا بیلسین لرآما سنین سنلییینه حوكم ائدن باخیشلارینا نه دئییم؟؟؟ بو باخیشلار گلیر دورور گؤزومون اؤنونده من چیلغین! من دلی..!! من سنه وورولموشام !! من...باخ سن قئددیس دئییل سن كی!؟؟
ملك دئییل سن كی؟!!سن..سن یالنیز بیر اینسانسان!! دوشون...!؟من سوچام، آغری یام، وارلیغاممن قیرمیزی آلما سوچویام، من سئوگی آغریسی یام، من سنین وارلیغینام!! «منی سئویرسن، سن منی چوخ سئویرسن!» بونو گؤزلریندن آنلادیم، اوندا کی منه باخمیردینباخیردین آیدین چایا و من او سویون آیدین لیغیندا یالنیز سئوگی آنلادیم. سن ایسته سنده ایسته مه سنده
بو گون توم یوللاریم سنه دؤنور آما سنه دوشونمك ایچینهئچ ماهانام یوخ، اؤزومله بو قرارا گلمیشم كی سنهدوشونمه ییم، آما بو قرار مندن قرار آلیب.هر آن اؤزلورم سنی، ساعاتین هر تیك تاكیلاباخیشلاریم ساعاتا یالواریر بلكه زامان گئچسین..
تیك.. تاك..تیك.. تاك..
نبضیم ساعات لا برابر چالیر..گؤزلریم تیلفوندا قولاغیم بیر تیكا باغلی دیرتوم وارلیغیم سنین له گئچدییی آنلاریم دا قالیبسنی چوخ اؤزلورم آما اؤزومه سؤز وئرمیشم ایلك دفعهسنه یوخ دئییب سنین گؤروشونه گلمه یه جه یم
- الو سلام
- بویورون؟ سلام..
- «یاخشی سان گولوم؟ بو آخشام هر زامان گؤروشدویوموزیئرده سنی گؤزلورم. گئج گلمه هاااا، بو گون سنسیزله میشم،گلمزسن داریخارام»
و من دوشونورم نئچه هفته بو آجی لارا دؤزوموم اولاجاق
سن منی سئومیردین، هئچ زامان. یالنیز من اؤزومو آلداتیردیم و اینانا بیلمیردیم سنین یوخلوغونا، ایندی سه اؤزومـوسن سـیز دوشونه بیلمیرم. سن سـیز یاشایا بیلمیرم، گون لریم گئچمیر، اولماسان گئجه یه سورگون اولموشام، اورییم سیخیلیر، اودلانیر، یانیر آما دئیه بیلمیرم؛ سنین نه یی نه آلداندیم؟ ندن بئله وورقون اولدوم؟ سنی گؤرنده دیلیم دوتولور، اللریم اسیر، آیاقلاریم اوستده دورا بیلمیرم، ندن بئله اولدوم؟بیلمیرم. من یالنیز بیلیرم سنه سؤز دئمه لییم، یالنیز بیر سؤز. آما سنله گؤروشنده، سنلهدانیشاندا، هر ندن سؤز آچیرام اوره کسؤزوندن سونرا. من بو باره ده ساعاتلار چالیشمیشام، آی لار دوشونموشم، بلکه ده ایللر... هئچ بیلمیرم... زامانی دا ایتیرمیشم. من یالنیز ایسته ییرم بیر سؤز دئییم بیر عؤمور ایسته دیمدئییم اولمادی،من آنام دان اؤیرندیم؛کیمم، نه یم... آنام همئشه دئییردی: « قیز گرک آغیر اولسون... ، قیز اوجادان گولمز!.. بیرینین اوزونه دیک-دیک باخماز!.. » آنامین دئدیکلریندن آنلادیم کی آنجاق هر نه یه دوشونمه لییم اؤزومدن و اؤز احساسیمدان سونرا. آنامدا آناسیندان اؤیرنمیشدی...
آنامین سئوگیسینی آتاما،پیشیردییییئمک لرده،همئشهحاضیر چای دا، تر-تمیز ائو ائشیگینده، بلکه ده آنامین سئوگیسینی تیترک اللرینده گؤردوم؛ آتام بورما بیغلارینا ال آتان زامانلار، قاشلارین دویونله یه نده، یوخسا اوجا سسله آناما بیر سؤز دئیه نده... او آنلار آنام اؤزون ایتیریب، اللری اسردی. آما آغلامازدی، هئچ کدرلنمه زدی، آجی مازدی دا... .بلکه ده آنام کدرینی گوللو فرشه دویونله -دییی الوان ایپک لرده گیزله تمیشدی... بیر کز آنامین اللری اوقدر اسدی کی یاریمچیلیق فرشینی منه تاپشیردی.. آنام گئتدی.. ایندی سه
منیم اللریم اسیر، منیم اللریم آما آغریدان آجی لاردان، کدردن یوخ.. منیم تیترک دوداقلاریمدا ایللردی بیر سؤز قورویوب، من ایللردی سئومک باشارسامدا سؤیله مک باشارمیرام...
من بو بویالی دونیادا یالنیز سنی سئچمیشدیم، یالنیز سنی سئومیشیم، منی بوراخدیغیندا بونا دوشوندون؟؟ بو مین-بیر رنگ دونیادا کی آغیندان قارا تؤره نیر، قاراسیندان آغ! دئ گؤروم هانسی رنگ سنی منه قایتاراجاخ؟
شیرین دیللیم، گولر اوزلوم، باخ گؤر سنی سئومک منی نه موتلو اینسان ائدیب گؤر من ابللردی سن سیز هله ده سنین قوخونلا موتلو یاشاببرام.. سن گل سوچوم نه اولسا اؤنمی یوخ، جزا نه یازسان بویون اولارام. گل ساده جه گولوشونله منی دلی ائت، گل، شیرین دیلینله آغ آتلی شاهزاده لر دونیاسینا آپار. گل، گول اوزونله منی گولدور.. سئویندیر..
سن سن منیم وارلیغیم، وارسانسا وارام، یوخسانسا تئیخا سنی گؤزله یه جه یم..
سن سیز ایللردی قار دوشوب دونیاما ساچلاریمی آغ-آپباغ آغاردیب. گل یازلاندیر، چیچک لندیر دونیامی. من یاز نغمه سییم گل قوی گوللر آچیلسین...
گون باتان چاغی، بیر زامان دیر کی نه سئومک اولور نه سئومه مک.
اورک اسدیریجی چاغلاری کی آدامی اؤزوندن ائله ییر. گون باتان چاغ لاری داریخیرام سنه، دوشونورم سنی...، یانی ایسته ییرم قاییداسان، گله سن، باغریما باسام سنی ابدییت شئعری اولوب سنی باغریمدا یاشادام، قورویام سنی،کؤکسومده ساخلایام، یئنه سئوینیب،سئوه م سنی. بیرگون منه دؤنسه ن..
یانی اولاربیر گون قاییدیب گله سن؟ یئنه یالنیزمنی سئوسن؟؟ همن سئودالی اولوب،هر باخیشیندا منی باغیراسان؟؟ الیمدن دوتوب منه منلییمی اؤیره ده سن؟؟ بو شهری سنله دولانیب، سنله تانیدیم.. سن سئویردین بورانی منه تانیتدیراسان، منده سئویردیم سنی تانییام..، بو آز فورستده شهرین ایچینده کی «انصار»ائویندن خوشاکو پیستینه کیمی سنله دولاندیم. بو شهرین نه قدر گؤزل اولدوغونو اؤیرندیم، آما هئچ یئرین «اوچ گونبز» کیمی سئومه دیم. ایلک آدین ائشیده نده دوشوندوم اوچ گونبزی وار...
من همئشه سئوردیم سنله اوچ گونبزده گؤروشوم، آما هئچ زامان بونو سنه آنلاتامادیم چون سن اورمان پارکینی(پارک جنگلی) چوخ سئوردین.. من اغزیمی آچینجا سن باغیراردین: «گلیرسن بو آخشام گئداخ اورمان پارکینا...»
ایندی ایسه هرآخشام بونو باغیریسان و من هر گون باتاندا اؤزومو اورمان پارکیندا دوشونورم.. سنینله بیرگه گونون قیرمیزی شفق لرینه باخیرام.. یئر-گؤی بیربیرینه باغلانیر، گؤی قیزاریر، سانکی قیرمیزی قان آخیر جیسمینه، یارالانمیش بیرعسگر کیمی..
بیر گون گرچک دونیادا اوچونوزوده باغیراجاغام (بایراغیم، یوردوم و سن!) اوچونوزوده باغریما باساجاغام. من بیر گون همن بو یورددا اؤزگور یاشایاجاغام، اوچ رنگلی بایراغیمیزی بو اورمـانـدا قالدیراجـاغـام... سنی ایتگینلیکدن، سورگون لوکدن قایتاراجاغام. سنده منی سئوجک سن، اورمویا گله جک سن، یانی منه دؤنه جک سن...
سونورام... دیلداشلاریما...
تیلفونو گؤتوردوم، اللریم اسیردی، اوره ییم بیر بالا قوش اوره یی کیمی چیرپیردی، آغزیم دوزلاق چؤللر کیمی قوروموشدو
****
یئنه دوزلاق دئدیم بوتون آجی لار یادیما دوشدو، بیر سوسوز دنیز، بیر حاقلی میللت، بیر بئینی بوش قورولتای... بیرده دیل قانماز سیلاح لار و قورشون لار..
دوشوندوم اولمایا عاشورا تیکرار اولوردو او گون کی بیر الی یالین میللت باغیریب سوسوزلوقدان جان وئرن دنیزینه سو ایسته ییردی.. ندن سو یئرینه جاواب گؤز یاشی آرتیجی قاز و قورشون ایدی؟؟.
*****
تیلفونو کؤکسومه سیخیب گؤزلریمی یومدوم، خاطیره لر تابلوسونو گؤزومون اؤنوندن گؤتورب نومره نی توتدوم.. ایشغال.. دوشوندوم هئچ زنگ آچماییم، نه ییم وار دئمک ایچین آخی؟؟ دئییم دولانماق خوش کئچدی؟ سوروشوم هارالاری دولاندین؟؟ آمان تانریم نئیله ییم؟؟ بیلسه بو نئچه گونو اونون دوشونجه سی ایله هر آنیم اون ایل کئچیب اوزولر.. یولداشلارینا تاپشیریب توتولسا منه دئمه سین لر هاردادیر... آما نه یاخشی اولاردی بیلسه یدی من هر آن اونا دوشونورم و اونون یولو منیم یولومدور، ندن بولاری ایندییه دک دئمه میشدیم اونا؟؟ اوره ییم سیخیشدی، ساندیم ایندی بوغازیمدان چیخار ائشیگه، تیلفونو گؤتوروب یئنی دن نومره نی توتدوم. بیر یورقون سس دئدی:« الو..» نه تانیش و ایستی بو سس! بوتون بورقونلوغوایلا بیلیردیم گولور، هئچ زامان توتقون اولمایان سئوگیلیم کسین ایندی ده گولوردو... سس یئنه دئدی «الو.. دانیشمایاجاقسیز..؟..»
دوشوندوم بو ائلیمیزین ایلک آددیم لاریدیر، سئوگیلیم بوآددیم لاری آتماقدا ندن من اونلا یولبیر اولماییم؟؟ گوجومو ییغیب تیترک سسله دئدیم:« دوستاق خوش کئچدی؟؟ بو کز نئچه سیلله یئدین؟؟ یئنه اللرینی باغلاییب سنی وورورکن آجی سؤزلردئدیلر؟؟ گؤز یاشلاریمی ییغمیشام شوشه یه، گؤزلورم گله سن بیرگه آپاریب تؤکک دنیزیمیزه...» گؤز یاشلاریم ماجال وئرمه دی اوجا سسله آغلادیم..
تئز اؤزومه گلیب یاشلاریمی سیلدیم. بیر درین نفس چکیب، بو یولا اولان گوجلو اینامیم کیمی گوجلو دانیشماق ایسته دیم، موحکم دئدیم:« بیلیرم بو سون کز دئییل، بیزلر بو یولو گئتمه لیییک، گلن دفعه خانلیغا گئدنده منی ده آپار. من یاخشی یولچو و گوجلو فیکیرداش اولماسامدا یاخشی یولداشام..، گله جک ده سینایا بیلرسن... منده ائلیمیزین باتمیش حاقلارینی آلماغا چالیشاجاغام.. بو یولدا باتوم قوناغیم اولور اولسون ، سیلله قوناغیم اولور اولسون بلکه ده موتلو بیر اینسان اولدوم و ائلیمین یولوندا قورشونلار قاپیمی چالدیلار.. توم بو آجی لارا حاضیرام یئتر بیر قورو نفس ایچین سوسماغیمیز ...»
یازار: آی سو سونورام بوتون دوستاق چکن دیلداشلاریما...
عضو شوید
عضویت سریع
آمار
وب سایت:
آمار مطالب
آمار بازدید
.jpg)
