آت، اوولاد،  تورپاق

خیال اوزاق- اوزاق
ایللره واردی،
چاپارلار یوللاردا
دومان قوپارتدی.

چاتدی حؤكمداردان
خاقانا خبر:
-گؤزل آغ آتینی
سن منه گؤندر!!

«آغ آتی وئركمی؟؟
آت كی قاناتدیر»

گلدی مصلحته
 ائل دسته- دسته.
خاقان چوخ دوشوندو،
او، غمه باتدی.

دئدی: قان دوشمه سین
 بیر آتین اوستده.
ایل كئچدی...
بولودلار
داغلاری ساردی،
چاپارلار یوللاردا
دومان قوپاردی،
چاتدی حؤكمداردان
خاقانا خبر:
- اورتانجیل اوغلونو
سن منه گؤندر!!!
منیم قوشونومدا
عسگرلیك ائتسین،
یوخ، یوخ آغ آتیما
مهترلیك ائتسین!

اوولاددان ال چكك؟
اوولاد موراددیر!»

گلدی مصلحته
ائل دسته- دسته.
خاقان چوخ دوشوندو
او، غمه باتدی.

دئدی قان دوشمه سین
بیر اوغول اوسته!
 
دونیایا نور ساچان
اركن باهاردی،
چاپارلار یوللاردا
دومان قوپاردی؛
- داها دارلیق ائدیر
بوردا یئر منه.
قونشو تورپاقلار
خاقان، وئر منه!!!!

«یادلار حاكیم اولسون
یوردوندا سنین؟؟»

گلدی مصلحته
 ائل دسته- دسته
-وجسیز تورپاقلاردیر
قوی وئرك گئتسین،
كول- كوس دا بیتمه ییر
اوشوران دوزده.
واخت كئچدی-
سوكوتلو دقیقه لرله
خاقان اؤز یئریندن
قالخدی كدرله:
«آغ آتی وئردیم؛
من آت تاپارام.
اوولادی وئردیم كی؛
اوولاد تاپارام.

من تورپاق تاپمارام
فقط دونیادا،
نییه تورپاغیمی
من وئریم یادا؟؟
تورپاق منیم دئییل
خلقین دیر تورپاق.
آنجاق عدالتین
حقیندیر تورپاق.
بابامدان بو تورپاق
منه میراثدیر
بو تورپاق اوستونده
اؤلسمده آزدیر.
گل دوشمن،
یاسینی
گؤره جك عالم.
سنه اؤزون بویدا
تورپاق وئره رم!»

چاپارلار هولناك
گئری چاپدیلار.
... یادلار او تورپاقدا
قبیر تاپدیلار.

*****
شفقلر اوفوقدا زر لچك كیمی-
داغدان توپا-توپا
بولودلار آخیر.

دونن قار یاغیردی
آغ چیچك كیمی
بو گونسه آ؛ چیچك
قار كیمی یاغیر.

هر فصیل تزه دیر هر دیلك اوچون،
عمرون داغ یولونو
تك چیخیرام من.

دونن داریخیردیم
 آغ چیچك اوچون
بو گون آغ قار اوچون
داریخیرام من.

شاعیر:نبی خزری
 

سورگون

تانیش بیر قوخو بورنونو سیغیشدیردی، نه اولدوغونو بیلمیردی آما بو قوخواونون ایللر بویو ایتیب- باتان حیسس لرینی اویادیردی، «بلكه...آما یوخ.. یوخ بو ایش ایمكان سیز. من بئله موتلو اولا بیلمرم » بو اولایا دوشونمك اونو آیاقدان سالیردی، آما بو قوخودان واز گئچه بیلمیردی، نه یی ایتیرسه، نه یی اونودسادا، بو اونودولان بیر شئی دئییل.. گؤزلرینین آغری سینی بیرداها یئنی دن حیسس ائتدی، گؤره بیلسه یدی كاش!! اللری آج لیقدان قورتولان قورد كیمی کلفچه نی(دست بند) سیندیریب بیر- بیریندن آیریلماق ایسته ییردی، بلكه بیر تانیش بیر شئی لمس ائدیب دینجه لسین، آیاق لاری تیریم- تیریم اسیردی سانكی ایندی ایشكنجه آلتیندان چیخیب میش.اوره یینین سسی نی ائشیدیب بیلیردی بو تانیش قوخو اونو تالواسالا سالیب. «.. نه بو تانیش قوخو؟؟.. نه بو تانیش قوخو تانریم كی بئله منی ایللر بوندان اؤنجه یه آپاریر؟ بو پولاد آرابادان دوشه بیلسه یدیم كاش.. بو آرابا كی ایللر اونو سیندیرماغا دوشونموشم و ایندی منیم اسگی یولداشلاریمین بیری اولوب، فیكیر داشلاریم و دیلداش لاریمی آلان بو آرابا!! هله دیر بو سوروندوكده ائلمین مارشینی ائشیده بیلیرم،هله دیر زامان توزو باسماییب او سسلری، هله دیر قان قوخویور هر حیسسه سی، ایهانت قوخویور بو آرابا!... آما ایللردیر یولداشلاریمین ایزینی یالنیز بو آرابادان آلا بیلیرم، بیزی پارچالاییب داغیداركن اومورام بیزی دوشونور، بلكه ده اودا بو بؤیوك ظولمدن دویوب، اونا قارشی دورماق ایسته ییر.. آچ قاپی لارینی آی آرابا! آچ! سنی تانری بو كز منی دوشون!.. آچ بو باغلی قاپی لاری...! »

قیش لاریندا ایختییار یوخدو یول یئریمك ایچین.. نه آجدیر، نه ده گوجسوز. آما بو قوخو.. بو عطیرلی هاوا... بو لذذتله دولو نفسلر اونو قرار سیز ائدیر... دونیا باشینا دولانیردی.. یارالی قوش كیمی فیرلانیب، ده یدی یئره... باشی ایسلاندی، دوشوندو:«یئره ایستی سو تؤكوب لر..»

بورنوندا داها بیر تانیش قوخونو حیسس ائتدی؛ قان قوخوسو!! اؤز قانینین قوخوسو و سئوگی سی تورپاغین عطیرینی..، ییخیلمیش دوغما یوردونون قوینونا، اونون اوچون ایللر سورگون اولموش... یولداش لار و فیكیردالارینی الدن وئرمیش.. چتین لیك لر و آجی لار چكمیش..و..

 ایندی توم وارلیغییلا، سللول لارینین هر تك به تكی ایله موتلولوغو حیسس ائدیردی نییه كی تورپاغ قوینونو اونا آچمیش و او دوداغیندا كی سون گولوشله سئوگیلی سینین گؤروشونه گئدیردی..

 یازار: آی سو