اورمو
گون باتان چاغی، بیر زامان دیر کی نه سئومک اولور نه سئومه مک.
اورک اسدیریجی چاغلاری کی آدامی اؤزوندن ائله ییر. گون باتان چاغ لاری داریخیرام سنه، دوشونورم سنی...، یانی ایسته ییرم قاییداسان، گله سن، باغریما باسام سنی ابدییت شئعری اولوب سنی باغریمدا یاشادام، قورویام سنی،کؤکسومده ساخلایام، یئنه سئوینیب،سئوه م سنی. بیرگون منه دؤنسه ن..
یانی اولاربیر گون قاییدیب گله سن؟ یئنه یالنیزمنی سئوسن؟؟ همن سئودالی اولوب،هر باخیشیندا منی باغیراسان؟؟ الیمدن دوتوب منه منلییمی اؤیره ده سن؟؟ بو شهری سنله دولانیب، سنله تانیدیم.. سن سئویردین بورانی منه تانیتدیراسان، منده سئویردیم سنی تانییام..، بو آز فورستده شهرین ایچینده کی «انصار»ائویندن خوشاکو پیستینه کیمی سنله دولاندیم. بو شهرین نه قدر گؤزل اولدوغونو اؤیرندیم، آما هئچ یئرین «اوچ گونبز» کیمی سئومه دیم. ایلک آدین ائشیده نده دوشوندوم اوچ گونبزی وار...
من همئشه سئوردیم سنله اوچ گونبزده گؤروشوم، آما هئچ زامان بونو سنه آنلاتامادیم چون سن اورمان پارکینی(پارک جنگلی) چوخ سئوردین.. من اغزیمی آچینجا سن باغیراردین: «گلیرسن بو آخشام گئداخ اورمان پارکینا...»
ایندی ایسه هرآخشام بونو باغیریسان و من هر گون باتاندا اؤزومو اورمان پارکیندا دوشونورم.. سنینله بیرگه گونون قیرمیزی شفق لرینه باخیرام.. یئر-گؤی بیربیرینه باغلانیر، گؤی قیزاریر، سانکی قیرمیزی قان آخیر جیسمینه، یارالانمیش بیرعسگر کیمی..
یاشیل اورمان، قیرمیزی اوفوق، ماوی گؤی (توم سندن اؤیرندیییم شئی لر..) سنده منیم یانیمدا.. رؤیالاریمین سونو، رؤیالاریمین کرالی بو...
بیر گون گرچک دونیادا اوچونوزوده باغیراجاغام (بایراغیم، یوردوم و سن!) اوچونوزوده باغریما باساجاغام. من بیر گون همن بو یورددا اؤزگور یاشایاجاغام، اوچ رنگلی بایراغیمیزی بو اورمـانـدا قالدیراجـاغـام... سنی ایتگینلیکدن، سورگون لوکدن قایتاراجاغام. سنده منی سئوجک سن، اورمویا گله جک سن، یانی منه دؤنه جک سن...
یازار: آی سو
:: برچسب‌ها:
اورمو ,
سئومک ,
سنله ,
انصار ,
اوچ گونبز ,
دولانماق ,
تانیماق ,
:: بازدید از این مطلب : 339
|
امتیاز مطلب : 38
|
تعداد امتیازدهندگان : 10
|
مجموع امتیاز : 10
عضو شوید
عضویت سریع
آمار
وب سایت:
آمار مطالب
آمار بازدید
.jpg)
