آپار منی


منی هر یئره سئوسن آپار،  بوندان  آرتیق  هئچ نه ایسته میرم، اینان بو سونونجو ایسته ییمدیرسندن، سن بیر نور کیمی سن، ظولمت سندن قاچیر، هر
 یئرده اولسان منیم جننتیم اورادیر. هر یئرده سن منی ده اؤزونله آپار..وارلیغین موستجاب اولموش دوعادیر.وارلیغین شفا وئرن حکیم دیر خسته اینسانا. آدینی چکمک (گتیرمک) سئوگی قوخوسودور، سنی سئومک موتلولوقو تاماملایان دیر. موتلولوق سنی گؤرمک دیر،سن سعادتی آچیقلایان سان، آنلاتان سان. سعادت سنین گؤزلرینده دیر، گؤزلرین گرنشین اودون سؤندورر، گؤزلرینه باخماق اودلا اویناماقدیر.  گؤزلرینه باخماق اولارمی؟؟ گؤزلرین سئحیر کیمی، سئحیردن قاچماق اولارمی؟ گؤزلرین فیرتینا سایاغی هر کسی حئیران ائدیر...

سؤیله گؤروم؟؟ بو شهرده سنین دلین اولمایان کیمدیر؟؟ کیمدی سنین سئودالین اولماسین؟؟ هانسی توپلومون اؤزل دانیشیقی سن دئییل سن؟ بوراداد هر کس سنی دوشونور، منده دلیلرین دلیسی، سن منه گوندوز، کئجه، یوخو- رؤیا..، سن منه نامازدا قویماییبسان!! سحرلر قونوتلاریمدا تانریدان سنین اولماغینی دیله ییرم. سجده لریمده سنیین یارانماغینا شوکر ائدیرم. من نه موتلویام کی سنی سئویرم. گؤتور منی اؤزون اولدوغون یئره...

یازار: آی سو

سیزه سونورام...

سن منی سئومیردین، هئچ زامان. یالنیز من اؤزومو آلداتیردیم و اینانا بیلمیردیم  سنین  یوخلوغونا، ایندی سه  اؤزومـو  سن سـیز دوشونه  بیلمیرم.  سن سـیز  یاشایا بیلمیرم،  گون لریم  گئچمیر، اولماسان گئجه یه سورگون اولموشام، اورییم سیخیلیر، اودلانیر، یانیر آما دئیه بیلمیرم؛  سنین نه یی نه آلداندیم؟  ندن بئله وورقون اولدوم؟ سنی گؤرنده دیلیم دوتولور، اللریم اسیر، آیاقلاریم اوستده دورا بیلمیرم، ندن بئله اولدوم؟  بیلمیرم. من یالنیز بیلیرم سنه سؤز دئمه لییم، یالنیز بیر سؤز. آما سنله گؤروشنده، سنله  دانیشاندا، هر ندن سؤز آچیرام اوره ک  سؤزوندن سونرا. من بو باره ده ساعاتلار چالیشمیشام، آی لار دوشونموشم، بلکه ده ایللر... هئچ بیلمیرم... زامانی دا ایتیرمیشم. من یالنیز ایسته ییرم بیر سؤز دئییم بیر عؤمور ایسته دیم  دئییم اولمادی،  من آنام دان اؤیرندیم؛  کیمم، نه یم...  آنام  همئشه  دئییردی: « قیز گرک آغیر اولسون... ، قیز اوجادان گولمز!.. بیرینین اوزونه دیک-دیک باخماز!.. » آنامین دئدیکلریندن آنلادیم کی  آنجاق هر نه یه دوشونمه لییم  اؤزومدن و اؤز احساسیمدان سونرا. آنامدا آناسیندان اؤیرنمیشدی...

آنامین سئوگیسینی آتاما،  پیشیردییی  یئمک لرده،  همئشه  حاضیر چای دا، تر-تمیز ائو ائشیگینده، بلکه ده آنامین سئوگیسینی تیترک اللرینده گؤردوم؛ آتام بورما بیغلارینا ال آتان زامانلار، قاشلارین دویونله یه نده، یوخسا اوجا سسله آناما بیر سؤز دئیه نده... او آنلار آنام اؤزون ایتیریب، اللری اسردی.  آما آغلامازدی، هئچ  کدرلنمه زدی، آجی مازدی دا... .  بلکه ده آنام کدرینی گوللو فرشه دویونله -دییی الوان ایپک لرده گیزله تمیشدی... بیر کز آنامین اللری اوقدر اسدی کی یاریمچیلیق فرشینی منه تاپشیردی.. آنام گئتدی.. ایندی سه

منیم اللریم اسیر، منیم اللریم آما آغریدان آجی لاردان، کدردن یوخ.. منیم تیترک دوداقلاریمدا ایللردی بیر سؤز قورویوب، من ایللردی سئومک باشارسامدا سؤیله مک باشارمیرام...

یازار:آی سو

گله جه ییم..

اورمودان چیخماغا ائله تله سیردیم؛ائله بیل،بیر گئجه ده اوردا قالسام بوغولاجاغام. آما آرابایا مینرکن، بوغولماق نه ییمیشی داها دوغرو آنلادیم! شوشه لری سیندیریب ائشیگه چیخماق ایسته ییردیم، یانیمـداکـی  قادین  منیــم  تالـواسـاللا  اویان - بویانا
باخماغیـما تعججوب لنمیشـدی. زامان  چوخ  چتیـن گئچیردی، گئتدیکجه  باشیم  آغیریییردی،  گؤزومون گؤردوكلر قارالیردی، ایستیدن قیپ-قیرمیزی قیزارمیشدیم. بوغازیم پارتلاماق ایسته ییردی،گؤزلریمین سویو النیردی،آغلادیقـجـا کؤکسـوم سیخیلیردی،  داها نفـس چکـه بیلمه ییردیم...
هاچان یوخو،سئل كیمی منی آپاریبدی هئچ بیلمه میشدیم.. دوروب گؤردوم(حوکوم وئریلدیی یئرده یم)نه قدر سیغیناجاقسیزام،بیر عؤمور یولداشلاریما دایاق اولموشدوم من.. ایندی نه یولداش قالیب نه دیلداش نه ده منده دیلک کی دایاغ اولوم...کاش بوردا دوشم، کاش  دئییم  یانلیش  مینمیشم،  کاش قاییدا بیلم، آما... آما؛ نه یاخشی  من  دوستاق دا  دئییلمـی  یاخشـی دوشوندوم، اولا بیلسین،  یولداشلاریما  تئریبون  اولوب سسلرینی دونیایا چاتدیرانام، بیلمیرم!! چالیشمالاریمیز نه زامان فایدا وئره جک!نه زامان یاسالی  ایستکلریمیز ده یر له نه جك، آما گله جک بیزیمدیره،اینانیرام..

یازار: آی سو

گل گؤزلیم

شیرین دیللیم هایانداسان؟ ندن منی بوراخیب گئتدین؟ هانسی باغیشلانمار سوچوما جزالاندیردین؟ دئ گؤروم، ندن سنسیزلیگه محکومام؟

من بو بویالی دونیادا یالنیز سنی سئچمیشدیم، یالنیز سنی سئومیشیم، منی بوراخدیغیندا بونا دوشوندون؟؟ بو مین-بیر رنگ دونیادا کی آغیندان قارا تؤره نیر، قاراسیندان آغ! دئ گؤروم هانسی رنگ سنی منه قایتاراجاخ؟

شیرین دیللیم، گولر اوزلوم، باخ گؤر سنی سئومک منی نه موتلو اینسان ائدیب گؤر من ابللردی سن سیز هله ده سنین قوخونلا موتلو یاشاببرام.. سن گل سوچوم نه اولسا اؤنمی یوخ، جزا نه یازسان بویون اولارام. گل ساده جه گولوشونله منی دلی ائت، گل، شیرین دیلینله آغ آتلی شاهزاده لر دونیاسینا آپار. گل، گول اوزونله منی گولدور.. سئویندیر..

سن سن منیم وارلیغیم، وارسانسا وارام، یوخسانسا تئیخا سنی گؤزله یه جه یم..

سن سیز ایللردی قار دوشوب دونیاما ساچلاریمی آغ-آپباغ آغاردیب. گل یازلاندیر، چیچک لندیر دونیامی. من یاز نغمه سییم گل قوی گوللر آچیلسین...

یازار:آی سو

گونش و یئل

سونورام... دیلداشلاریما...

تیلفونو گؤتوردوم، اللریم اسیردی، اوره ییم بیر بالا قوش اوره یی کیمی چیرپیردی، آغزیم دوزلاق چؤللر کیمی قوروموشدو
                             ****
یئنه دوزلاق دئدیم بوتون آجی لار یادیما دوشدو، بیر سوسوز دنیز، بیر حاقلی میللت، بیر بئینی بوش قورولتای... بیرده دیل قانماز سیلاح لار و قورشون لار..
دوشوندوم اولمایا عاشورا تیکرار اولوردو او گون کی بیر الی یالین میللت باغیریب سوسوزلوقدان جان وئرن دنیزینه سو ایسته ییردی.. ندن سو یئرینه جاواب گؤز یاشی آرتیجی قاز و قورشون ایدی؟؟.
                                   *****

تیلفونو کؤکسومه سیخیب گؤزلریمی یومدوم، خاطیره لر تابلوسونو گؤزومون اؤنوندن گؤتورب نومره نی توتدوم.. ایشغال.. دوشوندوم هئچ زنگ آچماییم، نه ییم وار دئمک ایچین آخی؟؟ دئییم دولانماق خوش کئچدی؟ سوروشوم هارالاری دولاندین؟؟ آمان تانریم نئیله ییم؟؟ بیلسه بو نئچه گونو اونون دوشونجه سی ایله هر آنیم اون ایل کئچیب اوزولر.. یولداشلارینا تاپشیریب توتولسا منه دئمه سین لر هاردادیر... آما نه یاخشی اولاردی بیلسه یدی من هر آن اونا دوشونورم و اونون یولو منیم یولومدور، ندن بولاری ایندییه دک دئمه میشدیم اونا؟؟  اوره ییم سیخیشدی، ساندیم ایندی بوغازیمدان چیخار ائشیگه، تیلفونو گؤتوروب یئنی دن نومره نی توتدوم. بیر یورقون سس دئدی:« الو..» نه تانیش و ایستی بو سس! بوتون بورقونلوغوایلا بیلیردیم گولور، هئچ زامان توتقون اولمایان سئوگیلیم کسین ایندی ده گولوردو... سس یئنه دئدی «الو.. دانیشمایاجاقسیز..؟..»
دوشوندوم بو ائلیمیزین ایلک آددیم لاریدیر، سئوگیلیم بوآددیم لاری آتماقدا ندن من اونلا یولبیر اولماییم؟؟ گوجومو ییغیب تیترک سسله دئدیم:« دوستاق خوش کئچدی؟؟ بو کز نئچه سیلله یئدین؟؟ یئنه اللرینی باغلاییب سنی وورورکن آجی سؤزلردئدیلر؟؟ گؤز یاشلاریمی ییغمیشام شوشه یه، گؤزلورم گله سن بیرگه آپاریب تؤکک دنیزیمیزه...» گؤز یاشلاریم ماجال وئرمه دی اوجا سسله آغلادیم..

 تئز اؤزومه گلیب یاشلاریمی سیلدیم. بیر درین نفس چکیب، بو یولا اولان گوجلو اینامیم کیمی گوجلو دانیشماق ایسته دیم، موحکم دئدیم:« بیلیرم بو سون کز دئییل، بیزلر بو یولو گئتمه لیییک، گلن دفعه خانلیغا گئدنده منی ده آپار. من یاخشی یولچو و گوجلو فیکیرداش اولماسامدا یاخشی یولداشام..، گله جک ده سینایا بیلرسن... منده ائلیمیزین باتمیش حاقلارینی آلماغا چالیشاجاغام.. بو یولدا باتوم قوناغیم اولور اولسون ، سیلله قوناغیم اولور اولسون بلکه ده موتلو بیر اینسان اولدوم و ائلیمین یولوندا قورشونلار قاپیمی چالدیلار.. توم بو آجی لارا حاضیرام یئتر بیر قورو نفس ایچین سوسماغیمیز ...»

یازار: آی سو
 
سونورام بوتون دوستاق چکن دیلداشلاریما...